Insulo de 22h47
Eta insulo kiu ekzistas sub neniu latitudo sed nur dum unu minuto. La minuto jam pasis cetere, sed tio ne estas tiel grava. Nur unu loĝanto: la mi de 22h47.
Poŝtkarto de la insulo de 22h47
Saluton,
Eta karto por diri al vi, ke ĉi tie ĉio bonas. Mi bone ĝuas la insulon kaj estas bone instalita.
Domaĝe, ke mi ne povas resti pli longe, sed unu bone uzita minuto foje estas pli bona ol tuta vivo.
Ĝis baldaŭ 😊
— La mi de 22h47
Manlibro pri la diskretaj fenomenoj de la insulo de 22h47
Cifereca transskribo de manskribita, skribaĉita kaj ĥaosa dokumento trovita en la bazkampadejo. La nelegeblaj vortoj estis anstataŭigitaj per la signo *️⃣.
La notoj de la transskribinto estas indikitaj per kursivo.
Antaŭparolo
Ĉiuj ĉi tie priskribitaj fenomenoj estis observitaj de mi mem surloke. Plej multaj preskaŭ ne rimarkeblas kaj *️⃣. La aliaj estas ĝenerale atribuataj al laceco, vento, malbona memoro aŭ iom tro varmega vespero. Mi faras mian eblon por *️⃣ kaj transskribi ĉion ĉi.
La sama teksto estas ripetita 5 fojojn kun etaj variaĵoj.
Fenomeno n°01 — Iriza pluvo
- Priskribo : Pluvo igas ĉion, kion ĝi tuŝas, iriza dum kelkaj momentoj.
- Kondiĉoj de apero : Tre fajna kaj disigita pluvo, kiel aŭtomata akvumado por prizorgi la gazonon. La pozicio de la subjekto aŭ de la suno havas neniun influon sur la observado de la fenomeno.
- Observitaj efikoj : Ajna planto, ŝtono, branĉo, *️⃣ aŭ alia objekto kovriĝas per eta ĉielarko, kiu dissolviĝas post kelkaj sekundoj.
- Supoza klarigo : Difrakto de la lumo, kiu okazas sisteme en la okulo de la observanto, sed kun tre limigita observa tempo (kelkaj sekundoj).
- Notoj : Estas tre bele vidi ĝin. Post kiam la pluvo ĉesas, la efiko malaperas. Tiu efiko ne aperas dum ĉiu pluvo.
Fenomeno n°01 — Fenomeno n°02 — Necertaj anguloj
- Priskribo : Kiam mi rigardas ion tro longe, la anguloj kaj la perspektivo fariĝas necertaj.
- Kondiĉoj de apero : Longa (pli ol 5 min) kaj intensa observado (sen distro) de objekto aŭ fenomeno.
- Observitaj efikoj : Kiel efiko de laceco, la pozicio de la objektoj en la spaco ŝajnas moviĝema kaj nekaptebla. Estas tre komplike transskribi tion skribe ĉar *️⃣ vortoj mankas je precizeco. La anguloj, perspektivoj, akreco, koloroj kaj eĉ formoj fariĝas necertaj. Se oni disigas sian atenton, tiam ĉio revenas al la normala stato.
- Supoza klarigo : Okulaj halucinoj aŭ ŝanĝiĝanta fiziko, neeble diri. Post kiam la koncentriĝo rompiĝas kaj la observado revenas al la normala stato, mi konstatas neniun *️⃣.
- Notoj : Konstatita nur ekster la bazkampadejo. Konstatita kaj en stato de laceco kaj en bona formo.
Ĝeneralaj rekomendoj
- Ne provu ĉion kontroli.
- Evitu ripetajn mezurojn en la centro de la teritorio.
- Akceptu la malgrandajn lokajn nekongruaĵojn.
- Neniu fenomeno observita ĝis nun pravigas ian ajn panikon.